لَامْـــزَفْ..زجل بقلم رشيد_شرقان

زجل

# لَامْـــزَفْ

الزغبي مسكين
تَبّـعْ لالة ؤ مالي
طريق الزهْوْ وَ الغْوَانِي
مشى وْرَا شيطانو
غا وسوس له
و واجبو ف الحــالْ
تولع بالليل . . والنسواني
حتى طبّْ ف اللي ورثو
و بعد غناه، صبح مفلس

ولى فمحافل لرديلة
يبات يلالي
فعايل الخمر الفاني
لحس له عقيلو
وݣعد بين لحيطان يتساطح
ملي تحز باع كبوطو
فعز الليالي..
و آه من سمرها الخالي
واللي شافو ينعتو بلجنون
ويݣول الله يشافيه
مسكين راه اتمس

دوز شلا من موالي
وحيت هو زهواني
محاها فايامات قلال
ومن قلة زهرو
ما صادف فحياتو
شي صاحب معقول
نزواتو ما لݣاتو
غير مع وجوه النحس

من بغا ينصحو
يݣولو انا مالي
آش دخلكم ف شغالي؟
خليوني ف حالي
غير تابعيني ب لعيانِي
واللِّي رْشَݣْتْو فيه يَتْعَيَّنْ
ومحال ضْرَّݣْ جنانُو
ينوَّرْ بَعْدْ ايْكَـرْمَسْ

#رشيد_شرقان.